«ەمبىمۇنايگاز» اكتسيونەرلىك قوعامىنا قاراستى التى وندىرىستىك قۇرىلىمدىق بولىمشەنىڭ ەڭبەك ۇجىمدارى ۇلىستىڭ ۇلى كۇنىنە ۇلكەن دايىندىقپەن كەلىپتى. بوتاقانداعى مەرەكەگە 450-گە جۋىق ادام قاتىسىپ, ءداستۇر-سالتىمىزعا دەگەن قۇرمەتتەرىن كورسەتتى.
– 2017 جىلى وندىرىستىك جوسپاردى تابىستى ورىندادىق, – دەدى «ەمبىمۇنايگاز» اق باسقارما توراعاسى ءانۋار جاقسىبەكوۆ. – بۇل – عاسىرعا جۋىق ۋاقىت بويى حالىق يگىلىگى ءۇشىن ايانباي ەڭبەك ەتىپ كەلە جاتقان ۇجىمداعى بىرلىكتىڭ, تاتۋلىقتىڭ ناقتى ايعاعى. ەمبىلىك مۇنايشىلار قاشاندا ەرەن ەڭبەكتىڭ ۇلگىسىن كورسەتىپ كەلەدى. كومپانيادا بەس مىڭنان استام جۇمىسشى قىزمەت ەتەدى, بۇگىنگى جەتىستىگىمىز – سولاردىڭ ۋاقىتپەن ساناسپاي اتقارعان ماڭداي تەرلەرىنىڭ جەمىسى.
شاراعا ارنايى كەلىپ قاتىسقان «قازمۇنايگاز» بارلاۋ ءوندىرۋ» اق باس ديرەكتورى قۇرمانعازى ەسقازيەۆ ەمبىلىك مۇنايشىلاردىڭ وتكەن جىلعى جوسپاردى ارتىعىمەن ورىنداپ, بيىلعى ەكى ايدا 457 مىڭ توننا مۇناي وندىرگەندەرىنە العىس ايتىپ, جەتىستىكتەردىڭ جالعاسىن تابۋىنا تىلەكتەستىك ءبىلدىردى. مەرەكەگە وراي ەلەۋلى ەڭبەكتەرىمەن دارالانعان قىزمەتكەرلەرگە العىس حاتتار تابىستالدى.
بوتاقان كەن ورنىنا جينالعان مۇنايشىلار دالا ءتوسىن اسەم انگە تولتىردى. كيىز ۇيلەردە مول داستارقان جايىلىپ, قازان كوتەرىلىپ, ۇلتتىق سالت-داستۇرلەردەن كورىنىستەر قويىلدى. مۇنايشىلاردى مەرەكەمەن قۇتتىقتاۋعا قازاقستاننىڭ ەڭبەك سىڭىرگەن قايراتكەرى ايگۇل قوسانوۆا مەن بەلگىلى ءانشى اقىلبەك جەمەنەي كەلىپ, ونەر كورسەتتى. ء«ىنجۋ-مارجان» بي توبى, دوسسور مادەنيەت ءۇيىنىڭ فولكلورلىق ءانسامبلى مەن ونەرپازدارى دا سالتاناتتىڭ ءسانىن كەلتىردى. بۇل كۇنى مۇنايشىلار دا ايانىپ قالعان جوق. ءتۇرلى ۇلتتىق سپورتتىق ويىندارعا قاتىسىپ, باق سىنادى. «كىر تاسىن كوتەرۋ», «بىلەك كۇشىن سىناۋ», «ارقان تارتۋ» سەكىلدى سايىستارعا شىقتى. جەڭىمپازدار ارنايى سىيلىقتارعا يە بولدى.
ايتا كەتسەك, كومپانيا سوڭعى جىلداردىڭ وزىندە عانا رەسپۋبليكالىق جانە جەرگىلىكتى بيۋدجەتكە سالىق تۇرىندە 654 ملرد تەڭگەدەن استام, وڭىرلىك ينفراقۇرىلىمدى دامىتۋعا 2,3 ملرد تەڭگە, دەمەۋشىلىك پەن قايىرىمدىلىق رەتىندە 2 ملرد تەڭگە قاراجات بولگەن. قاشاندا حالىققا قارايلاسىپ, ەل يگىلىگىن ەسەلەپ جۇرەتىن ەمبىمۇنايگازدىڭ قاي باستاماسىنا دا اتىراۋلىقتار قۇرمەتپەن قارايدى. قازاق دالاسىندا ۇلىستىڭ ۇلى كۇنى ايتىلار اڭگىمە مەن تارتىلار ءدام كوپكە ورتاق بولعان. وسى ءۇردىس ءالى كۇنگە جالعاسىن تاۋىپ كەلەتىنى قۋانتادى. اسىرەسە قايىرىمدىلىق پەن جاقسىلىق جاساۋ ناۋرىز تويىنىڭ ءمانىن ارتتىرا تۇسەرى انىق. بۇل داعدىدان ەمبىلىك مۇنايشىلار دا جاڭىلمادى. مەرەكەلىك شارا اياسىندا «مەيىرىمدى مەكەن» قايىرىمدىلىق جارمەڭكەسى ۇيىمداستىرىلدى. وعان وننان استام جەرگىلىكتى قولونەرشى مەن سۋرەتشى تۋىندىلارىن ۇسىندى. جارمەڭكەگە كومپانيانىڭ 60 جۇمىسشىسى دا قاتىستى. ءبىرى توقىما بۇيىمدارىن اكەلسە, ءبىرى ءتاتتى كۇلشە جاساپ, ەندى ءبىرى سالعان سۋرەتتەرىن, جاساعان زەرگەرلىك اشەكەيلەرىن قويدى.
بوتاقانداعى مەرەكە بەرەكەلى داستارقان باسىنداعى اشىق-جارقىن جۇزدەسۋگە ۇلاستى. وسىلايشا قويناۋى قازىناعا تولى مۇنايلى ايماقتاعى كەن ورنىنا جينالعاندار كوكتەمنىڭ كەرەمەت مەيرامىن شات-شادىمان كۇيدە قارسى الدى. وتكەن جىلدى تابىستى قورىتىندىلاعان ەمبىلىك مۇنايشىلاردىڭ بيىلعى مەجەلەرى دە ايقىن. ولار قاي ىستە دە ەڭ باستىسى بىرلىك پەن بەرەكە ەكەنىن جاقسى بىلەدى.
باقىتگۇل باباش,
«ەگەمەن قازاقستان»
اتىراۋ
